qen De'wI'wIjmeyDaq Ubuntu vIjomta'.  Xubuntu vIwIv.  mach, 'ej nom Qap.  qan HochHom De'wI'wIjmey, vaj Xubuntu vImaS.  'ach De'wI' ngajHa'Daq <Damn Small Linux> vIjomta'.

Linux vIparHa', 'ach motlh janmey 'op SamlaHbe'.  VirtualBox-Daq Xubuntu vIjom 'ej QoQ wab je vIQoylaH.  De'wI'mey latlh ... vIQoylaHbe'.  loQ qanmo' janmey Qapchu'be' 'e' vIQub.  De'wI' chu vISuq vIneHqu'bej.  ghaytan janmey SamlaH Ubuntu.

De'wI''a'wIjDaq Windows vIlo'taH.  chaq tugh naDev Ubuntu jom <Wubi> 'e' vIchaw' 'ach latlh De'wI'meyDaq vIwaHlI'.  Linux vIlo' vIghojDI', chaq De'wI''a'wIj SIgh Linux 'e' vIchaw'.

Tags: de'wi', linux

DaHjaj qep'a' wa'maH javDIch vIjeS. (wa'maH javDIch? jIqanqu'law'!) qaStaHvIS jaj neH vIjeSlaH, 'ach juppu'wI' vIghomlaH. vItIv.

qaDHom wa' vIta'. QaQ lut 'ach jIjatlhchu'be' 'e' vIQub... loQ mIS vay'. pe'vIl jIjatlhlaw'...

wejDIch KLBC qaD vIta' 'e' vInID 'ach jIluj. <DujDaq jIleng / DujDaq vIleng> vIyaj. chovnatlhvetlh vIQap. loQ jIQagh. loQ mu'tay' vIlIj. jIHaDnIS Hol jIlo'qu'nIS je.

jIDoy'qu'. DungluQ megh vISop. qaStaHvIS naQ jaj, pagh vISop. vaj juHDaq jImejnISDI' jIDoy'qu' jIghungqu' je. 'ach Hurghpa' chal jImej vIneH. tlhoS jIQap. loQ jImIS 'ach juHwIjDaq jIchegh 'e' vIQap. 'ach Turnpike-Daq jIlengchoH *ticket vIHevbe'. Do' wa'logh jIQagh 'e' vIchaw'lu'. qaSqa'chugh wanI'vam, Huch law' vInobnIS. jIDoy'taHvIS jIlengqa' 'e' vItul. Haqchor Hutlhqu' 'IwwIj 'ej jImISqu'choH. 'ej jIDoy'. jIDoy' vIjatlh'a'? lu'.

Dotlh: Doy'qu'

qaStaHvIS ben law' juppu' jIH chajwI' je.  maQupDI' pIj matay'.  matay'taHvIS maQuj; *movie*mey wIbej; qaStaHvIS rep law' majaw; SengwIj tI'meH muQaH 'ej SengDaj tI'meH vIQaH.  nayDI' pIj maghom 'ej jatlh Quj ghap.  ghIq paw puqloDpu'Daj.  rut maghom, 'ach nupchoH ghommeymaj.  pIjHa' maghomchoH.  qorDu'Daj Qorgh neH.  qorDu'Daj QorghnIS SoS 'e' vIHar.  Do'Ha' pIj majawlaHbe'.

wa'maH wa' ben bogh puqloDDaj wa'DIch.  qaStaHvIS vagh DIS pIjHa' majaw.  pIjHa' maghom.  qaStaHvIS DIS, chaq wejlogh maghom.  pIj qaSmo' vay' potlh jIHvaD jatlhlaHbe'.  rut lobHa' wa' puqloDDaj ghap qaS chachHey.  motlh QumwI'Daj rarDI' QumwI'wIj jIHvaD jatlh 'e' qImHa'.  vaj ghaH vIrI' 'e' mevchoH.

qen majaw 'ej ghu'vam choH 'e' wIwuqlaw'.  bIQ'a' HeH vISuch vIneHqu'.  <wISuchnIS jIH SoH je neH> jatlh chajwI'.  <qaStaHvIS jaj puS puqpu'wI' QorghlaH SoSwI'.> jIQuch 'ach jIHoj.  pIj <maghomnIS!> jIHvaD jatlh.  ghIq vIrI' 'ej nabmey qIl.  vaj jIloS.  loQ bIQ'a' HeH SuchmeH nabmaj vIlIj 'e' vIchaw''egh.  lIj ghaH je 'e' vIbej. 

DaHjaj maq, <bIQ'a' HeHDaq vISuch!  chong!>  bIQ'a' HeHDaq Suchchugh, ghaH vItlhej 'e' Hechbe'bej.  <juppu'wI' vISuchlaH je!> ghItlh je.  'op jup potlh law' jIH potlh puS. 

pIm wanI'vam 'e' vItul 'e' vIchaw''egh.  'ach buSHa'qa' chajwI'law'.  chaq chajDaj jIHbe'.  cha'maH wej ben jIpotlh 'e' Har 'ej potlh ghaH 'e' vIHar jIH.  DaHjaj choH ghu'.  pagh qaStaHvIS ben law' pIm'a' ghu' 'ej vItu'laHbe'?  vItu'qangbe''a'?

Tags: 'iq, jup
Dotlh: jI'IQ vIlonlu' je

Opera    
   
  
   
      
  
     

Tags: piqad

 ?

pIqaD vIghItlhDI', meyrI'mey neH vIleghlaH. 'ach mu'mey vIpolDI' 'ej vIlaDDI', pIqaD vIleghlaH. <period>mey <comma>mey vIleghlaHbe': meyrI'mey bIH. jumqu'.

Tags: piqad

qaStaHvIS wa' rep QonoSwIjDaq CSS vIchoHtaH.  wej <ngaSwI'mey> vIwam 'ej vInguvmoH.  ghIq permey vIlegh.  DIvI' Hol lo'.  vaj vIchoH.  'ach 'op neH vIchoHlaH, vaj DIvI' Hol lo'lI' 'op.  ghIHlaw'.  vImuS.  'ach poH vInatlh vaj qaStaHvIS ngaj poH vIpol.

QIpqu' LiveJournal-vaD CSS 'oghwI'pu'.  pagh Del.  Dogh permey.  'ej DaH jIqej.  <Neverwinter Nights> vIQuj 'e' vIHech.  <drow> law' vIHoHchu'.  vIchargh 'e' vIHech.

'oghwI'pu', tlhIHvaD SenwI'wIj vIchop.

Tags: qeh
Dotlh: bergh

rut wamwI'na' moj vIghro'Hom'wIj.  juHwIjDaq ghew puvbogh tu'lu'chugh, 'ej leghchugh, vaj SIbI' SeychoH 'ej bej.  nom qet 'ej Sup! not Sup vIghro'HomwIj.  'ach ghew Suq neHbej.

Do'Ha', ghew leghlaHbe'DI', ba' 'ej motlh vangchoH.  motlh vangDI', ba'.  'ej Qong. 'ej je'lu'meH qoy'. 

ramvam, 'uQ vIvuttaHvIS, ghew puvbogh legh 'ej *poof* wamwI'na' moj!  wamwI'na' DaDI' vIbej 'e' vItIvqu'. 'ach wej ghew Suq...

Tags: vighro'
Dotlh: jImon

DaHjaj Longwood Gardens wISuch vavwI' jIH je. lengmaj vIDel 'e' vIHech 'ach jIDoy'qu' 'ej DaH tI DelmeH mu'mey Hutlh tlhIngan Hol 'e' vIHar. puS tu'lu', 'ach DaH vIDel 'e' vInID vIneHbe'.

QonoSvamDaq vIghItlh 'e' vIHech (pIj <Hech> vIlo'law'...).  bong naDev ghogh chovnatlh vIqonpu' 'ej navvamvo' vIHaw'moHnIS.  :) 

jIDoy'.  DaHjaj qaStaHvIS wa' bID rep DujwIjDaq vIleng ghIq qaStaHvIS nI' poH jIyIt ghIq DujwIjDaq vIlengqa'.  'ej juHwIjDaq jIpawDI' loQ jIQot.  ghIq vIghro'HomwIj vI 'uch (bepbe'!  qaStaHvIS jav rep maDach vavwI' jIH je!  ghungqu'!) ghIq 'uQ vIvut ghIq 'uQ vISop ghIq loQ jIDIj.  Dojbe'bej latlh chavmeylIj.  :)

'eeeej... pItlh.  yIlop!

Tags: dap, leng, saj
Dotlh: Doy'

qaStaHvIS wej jaj, murI' vay'. pong'egh <AICR>. *cancer vor 'e' nID malja'vam 'e' vIHar. 'ach muri'DI', jIHvaD jatlh pagh. qaStaHvIS vagh lup pagh vIQoy ghIq rarHa rI'wI'.   *cancer QulvaD Huch vInobta'be'.  nobta'be' vavwI'.  vaj qatlh murI' malja'vam?  ghaytan murI' De'wI'.  QIp De'wI'mey, 'ej mIw Sovbe'.  jangDI' vay', jatlhnIS vay'.  Sovbe'bej.  vaj murI'taH 'ej munuQtaH je.

murI' 'e' chaw'be'lu' Hoch malja'mey.  chut tu'lu': murI'meH chaw' vItem vIneHchugh, tetlhDaq vIchel'egh.  'ej tetlhDaq vIchel'eghta'chu'.  'ach chut ghor malja', qar'a'?  ghobe': Do'Ha', *charity-mey chaH HochHom malja'meyvam.  vay'vad nob 'ej vay'vaD boQ, vaj munuQ 'e' chaw'lu'.

'ach SaH pagh murI'DI' 'ej vIjang!  tamchu'!  Hoch jaj!  pIj cha'logh wejlogh ghap!  jangchugh vay', <ghobe'.  jIQoS.  DaH yIDoH.> vIjatlhlaH.  'ach pagh vIjatlhlaH.

wa'leS *FCC-vaD vIQum 'e' vIHech.  vangnIS vay'.  jIvangqang jIH.

Dotlh: nuQ

qen *podcast* qechwIj majaw SuStel jIH je. jInmolvam vIpong vIneHchugh, <ghogh ta> vIlo'nIS, jatlh SuStel.  DaH tameywIj vIpongqa'nIS... va.

pIj tay'taHvIS DIpmey vIlo' 'ej rut vIlo'taHvIS vImuj.  rut yoy DIpmey vIboS. 

Tags: ghogh ta
Dotlh: tuH